الكونسيلر والهالات السودااء:
النهارده ان شاء الله هنتكلم عن الكونسيلر الخاص بالهالات السوداء
ايه ده هو فيه كونسيلر خاص بحاجات تانيه؟
اه طبعا في كونسيلر للعين عشان الهالات السوداء وفي كونسيلر للبشره عشان الحبوب والرؤس السوداء وعيوب البشره عامه وده هنتكلم عليه في مره لوحده عشان ماتتلخبطوش
بس في الاول في كلمتين لازم نعرف الفرق مابينهم كويس
كونسيلر = خافي للعيوب
كوريكتر = مصحح للعيوب
النهارده هنتكلم عن كونسيلر العين*****
طبعا كتير مننا بيعاني من الهالات السوداء وكتير مننا برضه استخدموا حاجات كتيره ومفيش فايده والهالات دي بضايقهم في المظهر العام سواء بالمكياج او من غيره
طب ايه الحل ونخلص من المشكله دي ازاي؟؟؟؟؟
طبعا بعد ما استخدمنا الوسايل الطبيه وعملنا اللي علينا ومفيش نتيجه هنضطر نلجأ للكونسيلر اللي هيخفي الهالات السوداء دي بس مش هيعالجها عشان الناس كلها تعرف هو مجرد خافي للعيوب مش علاج
1-ايه هو نوع الكونسيلر المناسب للهالات السوداء؟
النوع الكريمي او السايل هو افضل نوع لاخفاء الهالات السوداء
2- اجيبه لونه ايه؟
هقولك لو عندك الهالات خفيفه هاتيه لونه اصفر اما لو عندك الهالات غامقه فهاتيه لونه برتقالي او مشمشي
3-طب استخدمه ازاي؟؟؟
وده سؤال مهم جدااااا وعايزاكم تركزوا معايا اووووي
بعد ما جيبنا الكونسيلر واختارنا النوع المناسب لينا وعلي حسب شكل الهالات السوداء عندنا هقولكم تعملوا ايه بالخطواااااااات********
*اول حاجه انظف البشره كويس اوي باي غسول تنظيف او تونر للبشره
*هبتدي ارطب البشره بكريم مرطب مناسب لنوع البشره
*هبتدي احط واقي الشمس .ايه ماسمعتش احط ايه؟؟؟
هحط واقي الشمس زی ما اتفقنا لازم يتحط قبل الميك اب
*هحط الكونسيلر ايااا كان هتستخدمي كريم ولا بودره بطريقه الطبطبه يعني باطراف اصابعك هتبتدي تطبطبي علي الكونسيلر من خارج العين للداخل وليس العكس
*هسيبه من 5-10 دقايق عشان ينشف وبعدين اكمل مكياجي عادي جداااا
في ناس بيحبو يحطو بودره شفافه عشان تزود الاضاءه ف منطقه تحت العين ودي تتحط عادي بعد الكونسيلر
ملحوظاااااات::::
1-احط الكونسيلر طبقه خفيفه الاول لو بعد ما البشره شربته لسه فيه هالات احط طبقه تانيه
2-لو بتستخدمي كريم اساس حطي الكونسيلر بعديه
ولو بتستخدمي بودره حطي الكونسيلر قبليها
3-حاولي تستخدمي شادو (ظل العيون) اصفر او برتقالي لو الهالات عندك خفيفه ولو عندك جامده ابعدي عن الوان البنفسجي والاخضر والارجواني واستخدمي الوان حياديه زي اللبني او الروز
4-ابعدي عن الكونسيلر السميك او اللي هو الاستيك انك تستخدميه تحت عينيكي عشان هيبين الهالات اكتر والتجاعيد وبكده هتكوني زودتي الموضوع مش خافتيه
5-هاتي الكونسيلر بدرجه او درجتين افتح من كريم الاساس وابعدي عن اللون الابيض
6-ابعدي عن الكونسيلر اللي فيه زيوت او فيه ماده دهنيه لانه هيبوظ الدنيا وهاتيه نوع كريمي خالي من الزيوت
لو اتبعتي كل النصايح دي بجد هتخفي الهالات السوداء تماما وهتعملي ميك اب للعين ممتاز
بكده اكون خلصت موضوغ الكونسيلر والهالات السوداء يارب اكون افدتكم ولو فيه اي استفسار هجاوبكم عليه
وفي حلقه تانيه هشرحلكم ازاي تستخدموا الكونسيلر عشان نخفي عيوب البشره
الرئيسية 
