طبعا كلنا عندنا ارز ف البيت وافتكر مفيش بيت مفيهوش رز النهارده هقولكم علي ماسكات هتعملوها من الرز بسيطه جداا وسهله ونتايجها جاااامده اوووووي تعالو معايا نشوف الرز ده هنعمل فيه ايه بدل ما احنا بناكله وبس
اول حاجه تحضري الرز عشان الماسكات دي
طب ازاي احضره؟؟؟؟؟؟
هقولك اهوووو بس براحه عليا
هتجيبي الرز وتطحنيه كويس اووي لغايه لما يبقي ناعم اوووي وممكن تحطيه ف علبه او برطمان عشان يفضل جاف علي طول
تمام. طب هعمل بيه ايه
جيبي مسحوق الرز ده وانقعيه ف ميه لمده ربع ساعه وبعدين صفيه. خدي الميه وحطيها عندك ف التلاجه عشان كل لما تحتاجي تاخدي منها
طب دلوقتي بقي عندي مسحوق رز و الميه بتاعت الرز
هعمل ايه بقي ؟!!!!!
1-ماسك تنضيف البشره:
هتجيبي معلقتين مسحوق رز (البودره مش الميه) + 1/2 معلقه زعتر+ فنجان ميه دافيه+ 1/2 معلقه لمون
اخلطهم واغطيهم لمده ساعه ع اخد الزيوت من الزعتر وبعدين اصفيهم وبعد كده بقطنه امسح علي وشك بطريقه ديره لمده 10 دقايق وبعدين اشطف وشك بميه فاتره وممكن تستخدميه 3 مرات اسبوعيا.
2-ماسك تونر للبشره:
هتبلي وشك بميه عاديه وتمسحي بقطنه وشك كله وبعدين تجيبي ميه الرز وتغسلي بيها وشك وماتشطفهووووش و ممكن تستخدميه يوميا.
3-ماسك تقشير للبشره:
هتجيبي معلقه زيت جوز هند وتدفيها+معلقتين من مسحوق الرز + 1/2 معلقه لمون وتعجنيهم مع بعض لغايه ما يتماسكو شويه وتحطيهم علي وشك لمده 20 دقيقه وبعدين تشطفيه بميه ساقعه عشان تقفلي المسام وتعمليه مره او مرتين ف الاسبوع.
4-ماسك لتفتيح البشره:
هتجيبي معلقتين مسحوق رز + معلقه لبن وتعجنيهم لغايه مايتماسكوا وافرديهم ع وشك لمده 1/2 ساعه وبعدين اشطفيهم بميه فاتره وبعدين اشطفي بميه ورد ويتعمل مره اسبوعيا.
5-ماسك مرطب للبشره:
هاتي معلقتين من مسحوق الرز+ معلقه من ميه الورد واخلطيهم كويس وافرديهم ع وشك لمده 10 دقايق وبعدين اشطفي وشك بميه فاتره وادهني بميه ورد بعد كده وممكن نعمله من مرتين لتلاته ف الاسبوع.
6- كأساس للمكياج:
لو عايزه الميك اب بتاعك يقعد فتره طويله وتحسي ان وشك بيلمع من النضاره وانتي حاطه الميك اب استخدمي مسحوق الرز. هاتي فرشه المكياج وحطيها ف مسحوق الرز (البودره) وبعدين مشي بيها علي وشك كله قبل ما تحطي المكياج وشوفي النتيجه بنفسك.
وبكده اكون قدمتلك ماسكات جديده جداااا وبطريقه سهله وصدقيني لو جربتيها هتحسي بنتيجه هايله بنفسك
مستنيه تقولولي عملتو ايه واخبار الماسكات ايه معاكم
اهو بدل ما احنا قاعدين ناكل رز ونتخن نستخدمه ماسكات