مبدئيا البشرة بتتعرض كل يوم لعوامل خارجية زي الشمس والتراب والجفاف ،ودة بيقلل من درجة ترطيب البشرة ومظهرها الصحي
عشان كدة العناية اليومية للبشرة بتحافظ عليها نضراتها وتحميها من العوامل دي وبالتالي من الجفاف وعلامات التقدم بالسن.
طيب مبدئيا لازم تكوني عارفة نوع بشرتك قبل ما تبتدي البرنامج بتاعك
وتعرفي هل هي
جافة؟
جافة حساسة؟
دهنية؟
عادية؟
مختلطة؟
تحديد نوع البشرة مهم جدا جدا لانه بيرشدني للمنتجات اللي المفروض استخدمها والخطوات الصح
البرنامج اليومي بتاعنا هينقسم ل4 خطوات
1-غسول حسب نوع البشرة ..facial wash
يفضل انه يكون لطيف مفيهوش حبيبات (مش سنفرة)
بمنتهي البساطة اغسلي بيه كامل وجهك ورقبتك لمدة دقيقة بحركات دائرية واغسليه بعد كدة بمية
ملحوظة..فيه غسولات للوجة تسمي بالجافة او non rinse off facial washوالنوع دة ما بيتغسلش بالمية ،بيتعمل بقطنة عالوجه وبعدين يتجفف بقطنة برضه
في فرصة تانية هنتكلم عن امثلة ومنتجات لكل نوع بشرة لوحدها
2-تونر toner,tonning
خطوة التونر مهمة بالذات للبشرة الدهنية لانعا بتقفل المسامات وبتمنع لمعان البشرة وتراكم الدهون
بالنسبة للبشرة الجافة مش ضروري ،لكن لو حبيتي استخدمي تونر مكون من المنثول مش من الكحول لان الكحول بيزود جفاف البشرة
الخطوة برضه بسيطة اوي..بقطعة قطن او منديل غير معطر مشبعة بالتونر ،مشيها علي بشرتك وحسي بالانتعاش
3-الترطيب moisturization
الترطيب مهم لكل انواع البشرة حتي الدهنية
الترطيب بيحافظ عالبشرة من الجفاف والتجاعيد ولما تبقي البشرة رطبة بتدي نضارة وحماية من الحساسية الزايدة
لازم يكون المرطب متوافق مع نوع البشرة
المرطبات نوعين
فيه منها اللي بيحافظ علي ترطيب البشرة بانه بيمنع تسرب المية الزيادة زي الجلسرين وزبدة الكاكاو وزبدة الشيا والصبار وامثلة كتييييرة
وفيه منها انواع جديدة بنسميها مرطبات وظيفية functional moisturizersودي بيبقي فيها مكونات وفيتامينات بتعالج جفاف البشرة عن طريق اصلاح البشرة نفسها وترميمها
زي منتجات الترطيب الطبية ،بيوديرما،فيتشي،يورياج ونوكس وفيلورجا وغيرهم
يفضل دايما ترطيب مرتين يوميا
4-واقي شمس sun screen
اهمية واقي الشمس انه بيحمي البشرة من اشعة الشمس الضارة
اللي بتسبب جفاف واسمرار للبشرة
يفضل استخدام الكريم للبشرة الجافة
والسائل او الحليب للبشرة الدهنية
ومستحلبemulsionينفع للعادية والدهنية والمختلطة
يفضل اعادة وضعه علي البشرة كل 3 ساعات من النعرض للشمس ،معتمدش اني حطيته الصبح وخلاص
هنساعدك في بوست تاني في المقارنة بين الانواع واختيار الانسب ليكي
وكمان هنبقي نتكلم عن الروتين الاسبوعي
تعليقاتكو تهمني طبعا
الرئيسية 
